Në Kazan të Rusisë vazhdon sot Samiti i Organizatës ndërqeveritare, e njohur si BRICS. Atje ka mbërritur edhe sekretari i Organizatës së Kombeve të Bashkuara, Antonio Guterres, i cili pritet që të enjten të takohet me presidentin Vladimir Putin, ndërsa sot presidenti rus do të takohet me presidentin e Iranit, të Turqisë dhe të Etiopisë.
Sekretari i përgjithshëm i Organizatës së Kombeve të Bashkuara, Antonio Guterres ka mbërritur në Kazan të Rusisë, për të marrë pjesë në Samitin e njohur ‘BRICS 2024’, ku do të takohet edhe me presidentin rus Vladimir Putin. Ky do të jetë takimi i parë i sekretarit të OKB-s në më shumë se dy vjet, i cili pritet të mbahet të enjten.
Në ditën e dytë të samitit, pritet të mbahen dy sesione, një me pjesëmarrje më të gjerë dhe tjetri me pjesëmarrje më të ngushtë te liderëve. Presidenti Putin sot pritet të mbajë takime dypalëshe me presidentin e Iranit, atë të Turqisë dhe të Etiopisë.
Në këtë samit do të marrin pjesë edhe dhjetëra liderë të tjerë, përfshirë presidentin e Kinës Xi Jinping, kryeministrin e Indisë, Narendra Modi e ndër të tjerë edhe presidenti i Turqisë Rexhep Tajip Erdogan, si dhe delegacione nga Laosi, Kuba, Bolivia, Nikaragua e Mongolia.
Ky është një grumbullim diplomatik i liderëve të vendeve që nuk i kanë vënë sanksione Rusisë për shkak të luftës në Ukrainë, ndër më të mëdhatë të organizuar nga Rusia qëkur ka nisur luftën për pushtimin e Ukrainës.
Dje presidenti rus Putin është takuar me homologun egjiptian Abdel Fatah el-Sisi, ku temë e bisedimeve ishin bashkëpunimi ekonomik dhe marrëdhëniet mes dy vendeve.
Shkurtesa apo akronimi BRICS qëndron për emrat e vendeve që e kanë krijuar këtë organizatë ndërqeveritare, Brazili, Rusia, India, Kuba dhe Afrika e Jugut. BRICS u themelua në vitin 2009 ndërsa Afrika e Jugut iu bashkua në vitin 2011.
