Këshilli për Mbrojtjen e të Drejtave dhe Lirive të Njeriut (KMDLNj) ka reaguar ndaj një incidenti që ka shkaktuar shqetësim të madh në mesin e banorëve të fshatit Bajçinë në Podujevë. Në varrezat e këtij fshati, persona të paidentifikuar kanë vendosur një kryq të madh dhe flamurin kombëtar duke shkaktuar indinjatë të thellë te banorët, të cilët thuajse plotësisht i përkasin besimit islam.
“KMDLNj, e cila u njoftua nga vetë banorët, e ka cilësuar këtë akt si një provokim të qëllimshëm për të nxitur urrejtje dhe mosbesim në baza fetare. Organizata dënon ashpër këtë veprim, duke e konsideruar shkelje të rëndë të të drejtave të njeriut dhe të ushtrimit të lirë të besimit, të garantuar me ligj”, thuhet në komunikatë.
Tutje thuhet se, KMDLNj kërkon hetime të menjëhershme për të identifikuar dhe ndëshkuar përgjegjësit e këtij akti të shëmtuar, të cilin e cilëson si të pashembullt edhe në kohën e regjimit të ashpër të Serbisë. /Kosovatimes/
