Një skandal i rëndë tronditi Kosovën, pasi kompania private e kontraktuar nga qeveria humbi qindra pasaporta dhe dokumente të shtetësisë së qytetarëve, një ngjarje që ngre pyetje serioze për sigurinë kombëtare dhe përgjegjësinë e institucioneve. Prof. Asoc. Dr. Artan Nimani nga Forumi Intelektual “Europa 2030” tha: “Kjo humbje e paprecedent e dokumenteve shtetërore është një goditje e rëndë për besueshmërinë e institucioneve tona.”
Humbja përfshin rreth 600 dokumente të Ministrisë së Jashtme duke vënë në dyshim mënyrën se si informacioni diplomatik menaxhohet në nivel shtetëror. “Pyetja kryesore,” thekson Nimani, “është nëse këto dokumente janë humbur aksidentalisht, apo nëse kjo përbën një akt të qëllimshëm, me synim përfitime të caktuara politike apo personale.”
Kjo situatë ka sjellë shqetësim mes qytetarëve, të cilët kanë ngritur dyshime për sigurinë dhe integritetin e institucioneve shtetërore. Disa spekulojnë se humbja e dokumenteve mund të jetë një lëvizje për të manipuluar opinionin publik ose për të ndikuar në vendimet e kosovarëve që jetojnë jashtë vendit.
“Çdo vonesë në zbardhjen e këtij rasti vetëm do të forcojë dyshimet e qytetarëve dhe do të minojë besimin në drejtësi,” deklaroi Nimani duke bërë thirrje për një hetim të plotë dhe transparent nga Prokuroria e Kosovës.
Në një kohë kur integriteti i institucioneve është në lojë, qytetarët kërkojnë që ligji të zbatohet me përpikëri dhe që përgjegjësit të mbajnë llogari. /Kosovatimes/
