Melos Kolshi nga IKD ka thënë se zhvillimi i fundit në Kryesinë e Kuvendit, lidhur me ftesën dërguar secilit deputet të Kuvendit të Kosovës për pjesëmarrje në seanca, është një zhvillim i mirë, nëse ka rezultat, dhe nëse konsiderohet që kriza në Kuvendin e Kosovës është duke kaluar.
Në magazinën informative “InfoPlus” në RTK, Kolshi tha se deputetët e Kuvendit të Kosovës e kanë për detyrë kushtetuese e ligjore përmes rregullores së funksionimit të Kuvendit, pjesëmarrjen në seancë, qofshin ato të rregullta apo të jashtëzakonshme.
“Është hap i mirë i funskionimit të Kuvendit dhe presim që pozita t’i ketë numrat e nevojshëm për kalimin e ligjeve që janë në procedurë, për arsye se është jetike që pozita dhe opozita të bëhen bashkë dhe t’i kalojnë ligjet që për qëllim kanë funksionimin demokratik të Kuvendit”, tha Kolshi.
Ai shtoi se nëse vazhdohet me bojkot me mosvotimin e një numri të madh të projektligjeve, bëjnë që ato të kthehen në pikën zero.
Tutje ai theksoi se mosmiratimi i Ligjit për Buxhetin, do të ishte një hapje e një krize të re në vend.
