Policia e Kosovës, konkretisht Departamenti për Hetimin e Trafikimit ka njoftuar se, të hënën, në Prishtinë, janë arrestuar një zyrtar policor dhe dy persona të tjerë për posedim të substancave narkotike.
Sipas njoftimit të policisë, arrestimet janë kryer gjatë operacionit të koduar me emrin “Freeshopi”, pas hetimeve disa mujore në bashkëpunim me Prokurorinë e Krimeve të Rënda në Prishtinë.
“Gjatë realizimit të planit taktik antidroga e Policisë së Kosovës e mbështetur edhe nga njësitet për reagim të shpejtë (NJRSH) tek personat e dyshuar dhe gjatë kontrollit në trup dhe në lokacionet të tyre ka gjetur sasi e substancave narkotike me peshë rreth 370 gram, një peshore, tri thika dhe para të gatshme (4870) euro”, thuhet në njoftim.
Ndërsa lidhur me përfshirjen e zyrtarit policor në këtë rast menjëherë është njoftuar Inspektorati Policor i Kosovës, për procedura të mëtejme.
“Në konsultim me prokurorin nga Departamenti i Krimeve të Rënda është iniciuar rasti dhe tre personat e dyshuar dërgohen në qendrën e mbajtjes për proceduar të mëtejme ligjore”, thuhet në njoftim.
Tutje thuhet se rasti mbetet të hetohet nga antidroga e Policisë së Kosovës, Inspektorati Policor i Kosovës dhe Prokuroria e Krimeve të Rënda në Prishtinë.
Policia e Kosovës thotë se mbetet e përkushtuar për luftimin e të gjitha veprave penale dhe arrestimin dhe sjelljen para organeve të drejtësisë të të gjithë personave të dyshuar, pavarësisht rolit dhe funksionit që kanë. /Kosovatimes/
