Pagat e sektorit publik do të rriten nga janari i vitit 2025. Rritja do të aplikohet duke filluar nga ata që kanë pagat më të ulëta dhe fillimisht me 55 euro. Rritja do të riaplikohet në korrik me 110 euro, njoftoi kryeministri Albin Kurti në konferencën e sotme për media.
“Shprehur në vlerë monetare i bie që për të gjithë të punësuarit në sektorin publik pagat do të rriten nga 55 euro nga janari, dhe për 110 euro nga muaji korrik i vitit 2025”, ka thënë ai.
Ai ka thënë se rritja do të bëhet duke filluar nga ata që kanë rrogat më të ulëta, për të balancuar pagat.
“Duke pas parasysh nevojën për të mbështetur më së shumti ata që kanë paga më të ulëta, sidomos në këtë kohë kur i gjithë globi po përballet me kosto të rritur të jetës, ne kemi shkuar në maksimumin e lejuar në rritjen buxhetore për pagat dhe kemi vendosur mos ta rrisim vlerën e koeificentit, por ta rrisim koeficientin për një njësi. Vlera e koeficientit mbetet 110 euro, mirëpo rritet sasia e koeficientëve për një njësi. Duke filluar nga janari i vitit të ardhshëm nga 0.5 njësi, pastaj nga korriku i vitit të ardhshëm edhe për 0.5 njësi”, ka thënë ai.
Kurti ka thënë se me këtë vendim të rritjes së pagave ulet hendeku mes pagës më të lartë e më të ultë.
“Për mësuesin, policin, ushtarin, infermierin, zjarrfikësin rritja në përqindje do të jetë prej 18-20 përqind, kurse për pozitat më të larta do të jetë 6 deri në 7 përqind. Kostoja vjetore do të jetë rreth 120 milionë euro, e që bashkë me rritjen e pensioneve dhe shtesat e fëmijëve e sjellë totalin në 280 milionë euro më shumë në xhepat e qytetarëve”, ka thënë i pari i ekzekutivit.
