Trajneri i Chelsea, Enzo Maresca, ka deklaruar se nuk ka presion nga klubi për të siguruar një vend në katërshen e parë të Premier League në sezonin e tij të parë në krye të ekipit.
Chelsea aktualisht mban vendin e pestë në tabelën e Premier League, e cila kryesohet nga Manchester City.
“Klubi kurrë nuk më ka përmendur vendin e katërt si qëllim. Gjithmonë kanë theksuar se synimi është të ndërtohet diçka e rëndësishme për katër apo pesë vitet e ardhshme”, ka thënë Maresca gjatë një konference për shtyp, duke shtuar se përqendrimi është në ndërtimin e një projekti afatgjatë.
Ai gjithashtu ka theksuar se stafi dhe lojtarët janë të përkushtuar në përmirësimin e vazhdueshëm. “Presioni mbi lojtarët? Nuk mendoj, sinqerisht. Nëse shkon ndeshje pas ndeshjeje, mund të shohësh ku ndodhesh në atë moment. Nëse mendon për vendin e katërt apo të gjashtë, po mendon për qershorin, dhe për mua, është shumë larg”, është shprehur Maresca.
