Federata e Pingpongut e Kosovës, nën udhëheqjen e kryetarit Nehat Çitaku, ka nderin të mirëpresë eventin më të madh të pingpongut në Kosovë deri më sot – “WTT Feeder Prishtina 2024”.
Ky turne prestigjioz do të mbahet nga 30 tetori deri më 1 nëntor në Sallën e Sportit “1 tetori” dhe do të sjellë në Prishtinë 87 sportistë nga 37 shtete, përfshirë 9 vende që ende nuk e kanë njohur Kosovën.
Pas suksesit të organizimit të “WTT Youth Contender Prishtina 2024”, federata është e përgatitur të ofrojë një garë në nivel botëror.
Sportistët si Anders Lind, i renditur i 29-ti në botë, dhe Natalia Bajor, e renditur 49-ta, janë ndër yjet e këtij eventi.
Garat do të zhvillohen me sistem eliminues, duke nisur që nga ora 10:00 deri në 21:00 në ditën e parë, me përballje individuale dhe çifte. /Kosovatimes/
