Analisti Gurakuç Kuçi ka përshëndetur thirrjen e fundit të Shteteve të Bashkuara, Britanisë së Madhe dhe Japonisë për shpërbërjen e misionit të UNMIK-ut në Kosovë, të bërë në Këshillin e Sigurimit të OKB-së. Sipas Kuçit, kjo kërkesë është një hap i rëndësishëm drejt konsolidimit të pavarësisë së Kosovës dhe pasqyrimit të realitetit kushtetues.
Kuçi thekson se Rezoluta 1244, e përfshirë në Kushtetutën e Kosovës, nuk pengon të drejtën për pavarësi, siç është konfirmuar nga Gjykata Ndërkombëtare e Drejtësisë në opinionin e saj të vitit 2010. Sipas tij, misioni i UNMIK-ut është tashmë i pavlefshëm dhe mund të vazhdojë vetëm në formën e një përfaqësie diplomatike, si një ambasadë e OKB-së.
Analisti gjithashtu ka shprehur shqetësimin për përpjekjet e Serbisë për të ruajtur narrativën e saj për kthimin në Kosovë, bazuar në Rezolutën 1244, duke shtuar se ky diskurs përforcohet nga disa figura brenda vendit.
“Në të drejtën ndërkombëtare, narracioni ka peshë të madhe, dhe Serbia po lobon që të zbehë opinionin e GjND-së për të forcuar qëndrimin e saj,” thekson Kuçi.
Ai u bën thirrje liderëve politikë që të mbajnë interesat e vendit mbi çdo interes tjetër politik dhe përforcon se pavarësia e Kosovës duhet të jetë e pacenueshme. /Kosovatimes/
