Trajneri i Liverpool, Arne Slot, ka shprehur vlerësimet e tij për trajnerin e Bayer Leverkusen, Xabi Alonso, përpara ndeshjes së Champions League të martën në “Anfield”.
Në konferencën për shtyp para ndeshjes, Slot e ka cilësuar Alonso si një figurë të rëndësishme për Liverpool dhe një trajner të veçantë që ka transformuar Leverkusen në një ekip të fortë.
“Është një ndeshje e madhe evropiane”, ka thënë Slot, duke theksuar rëndësinë e Alonso në historinë e Liverpool, sidomos për kontributin e tij në Evropë. “Leverkusen është në një nivel të shkëlqyer nën drejtimin e tij, si në Bundesliga ashtu edhe në Evropë”, është shprehur ai.
Duke vlerësuar arritjet e Alonso, Slot ka theksuar se është e qartë që spanjolli ka një aftësi të jashtëzakonshme menaxheriale. “Është e vështirë të thuash se çfarë e bën atë një trajner të veçantë nëse nuk punon me të përditë, por është e qartë që është i tillë”, ka thënë Slot. “Ai mori një ekip që ishte në fund të tabelës, pa bërë shumë ndryshime në lojtarë, dhe arriti të shkojë deri në finalen e Europa League.”
