Avokati i Popullit, Naim Qelaj, në Komisionin Parlamentar për të Drejtat e Njeriut, në shqyrtimin e Raportit të Progresit, ka folur për gjuhën në medie, ku sipas tij, në përgjithësi ekziston një standard i respektimit të lirisë së shprehjes, por dhe për bashkëpunimin ndërinstitucional ndërmjet Avokatit të Popullit dhe institucioneve të tjera publike.
Avokati i Popullit, Naim Qelaj ka deklaruar se ‘Raporti i Progresit’ ka konstatuar njëfarë progresi në drejtim të respektimit të të drejtave të njeriut, por që, sipas tij, kjo nuk është e mjaftueshme, sepse vërejtjet e dala nga ai raport janë të përsëritura.
Këto komente Qelaj i bëri në Komisionin Parlamentar për të Drejtat e Njeriut, ku u shqyrtua Raporti i Progresit. Ai ka folur për gjuhën në medie, ku sipas tij, në përgjithësi ekziston një standard i respektimit të lirisë së shprehjes, por edhe për bashkëpunimin ndërinstitucional ndërmjet Avokatit të Popullit dhe institucioneve të tjera publike.
“Raporti i Progresit ka konstatuar një progres në drejtim të respektimit të të drejtave të njeriut. Është mirë, sepse ka progres, por në anën tjetër shqetësuese është se në vazhdimësi përsëriten shqetësime të njëjta, gjë që tregon se institucionet duhet të kenë më shumë kujdes në trajtimin e atyre çështjeve që dalin nga ai raport”, tha Qelaj.
Ai, tutje, tha se është konsideruar sukses koordinimi në mes të institucionit të Avokati të Popullit dhe Zyrës së Qeverisjes së Mirë, për monitorimin e zbatimeve të rekomandimeve të Avokatit të Popullit, e që sipas tij kjo, megjithatë është e pamjaftueshme, sikundër nënvizoi ai, këtë vit vërehet trendi i rënies së zbatimit të rekomandimeve krahasuar me vitin paraprak.
Si fushë problematike në Raportin e Progresit, Qelaj përmendi adresimin e mangësive lidhur me mbrojtjen e të drejtave të personave me aftësi të kufizuar.
Qelaj kërkoi që deputetët të kenë një bashkëpunim më të ngushtë me Avokatin e Popullit, që raportet e institucionit që përfaqëson ai të merren në konsideratë.
“Ajo që unë kërkoj nga komisionet parlamentare, jo vetëm nga ky komision është që raportet e Avokati të Popullit të merren në konsideratë, të diskutohen ato rekomandime, të ftohen autoritetet publike dhe të pyeten pse nuk kanë vepruar sipas rekomandimeve të Avokatit të Popullit”, nënvizoi ai.
