Në ambientet e Rektoratit të Universitetit të Prishtinës u bë nënshkrimi i Memorandumit të Mirëkuptimit në mes Universitetit të Prishtinës dhe Programit SHER (Sustainable Higher Education and Research). UP më herët ka pasur bashkëpunim me WUSS AUSTRIA dhe memorandumi me SHER është si rrjedhojë e atij bashkëpunimi.
Ndër të tjera u tha se Austria gjithmonë e ka ndihmuar Kosovën në procesin e arsimimit të lartë dhe hulumtimeve shkencore fillimisht përmes WUSS Austria dhe tani si vazhdimësi përmes SHER. Qysh në vitet e ’90-ta shteti austriak ka ndihmuar nxënësit e Republikës së Kosovës në studime të larta.
Memorandumi i Mirëkuptimit shënon një hap të rëndësishëm në avancimin e zhvillimit akademik dhe kërkimor të UP-së, me fokus në aktivitetet e përbashkëta, mbështetjen e ekspertëve dhe ngritjen e kapaciteteve. Bashkëpunimi synon të forcojë integrimin e kërkimit, politikave dhe zhvillimit universitar për një sistem të qëndrueshëm dhe të bazuar në fakte të arsimit të lartë në Kosovë.
Prof. Dr. Arben Hajrullahu, rektor i UP-së, gjatë fjalës së tij theksoi mbështetjen e Austrisë si një kontribut i kahershëm që ka qenë thelbësor në nxitjen e arsimit në Kosovë dhe rajon. Ndërkaq, Aqim Emurli, drejtues i ekipit të SHER, theksoi përkushtimin e SHER për të nxitur ndryshimet sistematike në peizazhin e arsimit të lartë, me fokus në qeverisjen, kërkimin dhe forcimin e lidhjeve midis akademisë dhe sektorit privat.
Me ndihmën e Wuss Austria dhe pastaj përmes SHER u hartua strategjia edhe statuti i Universitetit të Prishtinës. /Kosovatimes/
