Në gjithë Ukrainën është shpallur alarmi rrezik ajror herët në mëngjes dhe banorëve u është thënë të strehohen në vend. Andriy Jermak, këshilltari kryesor i presidentit ukrainas Volodymyr Zelenskiy, njoftoi në rrjetet sociale: “Putini tani është duke nisur një sulm me raketa në Kiev”.
“Shpërthime në qytet. Mbrojtja ajrore funksionon. Qëndroni në strehimore!”, njoftoi administrata e qytetit të Kievit përmes aplikacionit Telegram. Në sulmin e parë raketor në më shumë se dy muaj, Rusia përdori raketa lundrimi të lëshuara nga avionë strategjikë, si dhe raketa balistike, sipas ushtrisë ukrainase.
Siç raportohet nga një korrespondent i BBC-së, bombarduesit rusë Tu-95 qëlluan rreth 6 grupe raketash të lundrimit në objektiva në të gjithë vendin.
Shpërthime në Kiev
Reuters raporton për shpërthime që mund të dëgjohen në pjesën lindore të kryeqytetit. Një re e trashë tymi po ngrihet mbi të paktën një vend, por ende nuk dihet nëse shpërthimet ishin rezultat i punës së mbrojtjes ajrore apo nëse raketat goditën objektivat e tyre. Dy drone luftarake Shahed u panë gjithashtu mbi pjesën jugore të qytetit. Autoritetet nuk kanë raportuar ende për viktima apo dëme.
Administrata ushtarake e qytetit të Kievit ka paralajmëruar se energjia elektrike mund të ndërpritet pasi Rusia vazhdon të sulmojë infrastrukturën energjetike përpara muajve të ardhshëm të dimrit.
Më 26 gusht, Rusia sulmoi Ukrainën me më shumë se 200 dronë dhe raketa, duke vrarë shtatë persona dhe duke prekur objektet energjetike në të gjithë vendin. Ai sulm, sipas Kievit, përfaqësonte “sulmin më masiv” gjatë luftës.
