Ministri i Kulturës, e Rinisë dhe e Sportit (MKRS), Hajrulla Çeku, në prani të anëtarëve të jurisë së sivjetme për dhënien e Çmimeve për Dramën Origjinale Shqipe “Katarina Josipi”, ua ka dhënë sot çmimet tre fituesve për Dramën Origjinale Shqipe “Katarina Josipi” nga konkursi i sivjetmë i shpallur nga MKRS-ja muaj më parë.
Juria sivjet ka zgjedhur këto tri drama për shpërblim:
Çmimi i parë i është dhënë dramës “Udhëtimi i familjes Muller në Unmikistan”, autorit Jeton Neziraj.
Çmimi i dytë dramës “Fridrih Fluturaku”, autorit Astrit Kabashi.
Çmimi i tretë dramës “Zelus”, autorit Hynor Vitija.
Aplikimi i dramaturgëve me dorëshkrime të dramave është bërë me shifra dhe ka qenë anonim.
Dramaturgu dhe profesori Fadil Hysaj, i cili ka qenë kryetar i jurisë, kërkoi që dramës bashkëkohore shqipe t’i jepet përparësi dhe ky konkurs të vazhdojë edhe më tutje, pasi që çdo vit shohin prurje të reja.
Ministri Hajrulla Çeku i përgëzoi fituesit. Ai theksoi se do të përpiqen t’u ofrojnë kushte edhe më të mira të punës dramaturgëve, regjisorëve dhe të gjithë artistëve me rregulloren e re për ta, e që sipas tij është duke e hartuar Ministria e Kulturës.
Ministri Çeku shprehu solidaritet instutcional me Jeton Nezirajn për shkak se kohëve të fundit ka qenë i sfiduar për shkak të punës së tij për arsye politike ose arsye të tjera joparimore edhe për dramën “Të gjashtët kundër Turqisë” dhe për “The Handke Project”.
“Jemi me ty dhe me të gjithë krijuesit për të bërë punën më të mirë të mundshme”, shtoi Çeku.
Kurse Jeton Neziraj tha se “jam i lumtur edhe për faktin që ky konkurs po vazhdon dhe e ka atë peshën e merituar sepse e di që sivjet i kemi pasur 24 drama”.
Më tutje ai tha se ka pak drama shqipe që janë inskenuar.
“Teatri në Kosovë është i lidhur me dramën shqipe. Drama është themel boshti i teatrit shqiptar, i teatrit në Kosovë, prandaj vëmendja kah dramat shqipe nënkupton një teatër të zhvilluar, një teatër që i merr parasysh kërkesat, qëndrimet shoqërore, politike dhe sociale”, pohoi Neziraj.
