Ruben Amorim është prezantuar si trajneri i ri i Manchester United, duke shprehur krenarinë dhe emocionet për këtë rol.
Të premten, klubi anglez ka publikuar një klip ku trajneri portugez shfaqet në “Old Trafford”, duke vëzhguar stadiumin.
Në intervistën e tij të parë për kanalin televiziv të klubit, Amorim është shprehur se ndihet i nderuar që gjendet te United. “Jam vërtet shumë krenar që jam trajner i Manchester United, kështu që është mahnitëse. Është një nder i vërtetë të jem këtu. Jam shumë i emocionuar dhe në të njëjtën kohë mjaft i qetë. Mendoj se jam aty ku duhet të jem. Kjo është ndjenja ime”, ka thënë ai.
Amorim te United e zëvendëson Erik ten Hag, i shkarkuar pas një fillimi të dobët të sezonit, ndërsa për një periudhë të shkurtër, skuadra është drejtuar nga Ruud van Nistelrooy si trajner i përkohshëm.
Debutimi i tij në drejtimin e skuadrës do të jetë më 24 nëntor, në ndeshjen jashtë fushe kundër Ipswich.
Aktualisht, Manchester United renditet në vendin e trembëdhjetë në Premier League, që kryesohet nga Liverpool.
