Deputeti i AAK-së, Shemsedin Dreshaj e ka vlerësuar diskriminues Projektligjin për Ndryshimin dhe Plotësimin e Ligjit për Skemat Pensionale të Financuara nga Shteti, i cili pritet të debatohet sot në vazhdimin e seancës plenare në Kuvendin e Kosovës.
“Ky ligj është diskriminues, pasi qytetarët e vendit që kanë kontribuar me vite nuk e gëzojnë më të drejtën të shkojnë me kontributet e tyre në pensionin meritor. Kush nuk posedon 15 vite deri më 1 janar 1999 nuk e gëzon të drejtën e pensionit kontributdhënës, prandaj ky nen duhet të largohet menjëherë”, ka theksuar Dreshaj.
Ai u ka bërë apel deputetëve të pozitës dhe opozitës të mbështesin nismën e këtij subjekti për largimin e nenit 8 të këtij ligji, në mënyrë që të gjithë pensionistët t’i gëzojnë pensionet kontributdhënëse.
“Kjo konferencë duhet të jetë shtytje që kjo nismë e iniciuar nga AAK, më 13.05.2022 të gëzojë mbështetjen e komplet parlamentit, që kjo padrejtësi të largohet njëherë e përgjithmonë. Kjo nismë ka qenë edhe më herët nga Aleanca, por me ndërrimin e qeverive është ndërprerë. E nëse nuk votohet sot kjo nismë, do ta ketë fatin që të nis edhe njëherë nga fillimi”, ka shtuar Dreshaj.
Ai ka theksuar se me propozimin e AAK-së, parashihet që pensionet kontributdhënëse t’i gëzojnë të gjithë pensionistët varësisht nga vitet që kanë punuar para datës 1 janar 1999.
“Siç e dini, kemi raste kur për një ditë, apo për një javë, dikush që nuk ka arritur t’i bëjë 15 vite nuk e gëzon pensionin e merituar. Kërkesë e jona është që të largohet ky kushtëzim jologjik, i dëmshëm dhe diskriminues për punëtorët të cilët viteve 90-ta ishin larguar dhunshëm dhe jashtëligjshëm nga institucionet shtetërore të pushtetit të atëhershëm”, është shprehur tutje Dreshaj.
