Trajneri i Meksikës, Javier Aguirre, është gjakosur pas një incidenti të dhunshëm të ndodhur pas humbjes 2-0 ndaj Hondurasit në ndeshjen e parë çerekfinale të CONCACAF Nations League.
Incidenti ka ndodhur në stadiumin “General Francisco Morazan” në San Pedro Sula, teksa Aguirre po ecte pranë vijës anësore për t’i dhënë dorën trajnerit kundërshtar, Reinaldo Rueda. Një kanaçe e hedhur nga tifozët e ka goditur atë në kokë, duke i shkaktuar plagë.
Por pas ndeshjes, Aguirre ka zgjedhur të mos përqendrohet te incidenti. “Ky është futboll, dhe nuk ka kuptim të përmendim të tjera gjëra, sepse nuk jam i prirur të ankohem”, ka thënë ai.
Në një deklaratë zyrtare, CONCACAF e ka dënuar ashpër ngjarjen, duke e cilësuar të papranueshëm për futbollin. “Siguria e ekipeve dhe tifozëve është prioritet për CONCACAF. Sjellje të tilla të dhunshme nuk kanë vend në futboll. Rasti tani do të kalojë për shqyrtim dhe hetim të mëtejshëm në Komitetin Disiplinor të CONCACAF-it”, thuhet në deklaratë.
