Federata e Futbollit e Rumanisë ka dënuar vendimin e Kombëtares së Kosovës për të mos u kthyer në fushë pas kërkesës së gjyqtarit, duke e quajtur këtë veprim mungesë respekti për futbollin dhe frymën e “fair-play”.
Në një deklaratë për mediat të lëshuar të premten, Federata rumune ka falënderuar tifozët rumunë për mbështetjen e tyre dhe për faktin që nuk u janë përgjigjur provokimeve të ekipit mysafir.
“8,957 tifozë ishin të pranishëm në Arenën Kombëtare në ndeshjen kundër Kosovës, një përballje që filloi në temperaturë 2 gradë Celsius dhe përfundoi në kushte nën zero. Kombëtarja e futbollit e Rumanisë dëshiron të falënderojë të gjithë të pranishmit për mbështetjen e jashtëzakonshme dhe për sjelljen e treguar gjatë kësaj ndeshjeje, e cila do të mbetet në kujtesën e të gjithëve jo vetëm për faktin se zgjati 3 orë, por edhe si një shembull uniteti dhe solidariteti. Ndeshja, e cila filloi të premten në orën 21:45 dhe përfundoi të shtunën në 00:48, ishte një sfidë për të gjithë të përfshirët. Por së bashku, “tricolorët” dhe tifozët e tyre treguan se e respektojnë dhe e duan këtë sport, duke dëshmuar se uniteti mes tyre tejkalon çdo bindje apo ambicie tjetër. “Tricolorët” falënderojnë tifozët për mënyrën se si i inkurajuan dhe për mirëkuptimin e treguar për qëllimin e përbashkët në këtë ndeshje. Gjithashtu, ata vlerësojnë faktin që tifozët, sa më shumë që ishte e mundur, nuk iu përgjigjën provokimeve të ardhura nga miqtë tanë. Nga ana tjetër, është e pafalshme veprimi i ekipit mysafir, i cili zgjodhi të largohej nga fusha pa lejen e gjyqtarit, duke refuzuar ta përfundonte ndeshjen brenda fushës së lojës dhe në frymën e fair-play-it. Ky veprim reflekton një mungesë respekti jo vetëm për futbollin, por edhe për profesionin e futbollistit”, ka shkruar Federata rumune në një komunikatë.
Ndryshe, ndeshja Rumani – Kosovë e zhvilluar të premten është mbyllur nga gjyqtari pa praninë në fushë të skuadres së Kosovës. Kjo pasi skuadra kosovare kishte lëshuar fushën në kohën shtesë të ndeshjes pasi nga shkallët e stadiumit të Bukureshtit ishin dëgjuar thirrje: “Serbia, Serbia”.
