Shkolla fillore ‘Naim Frashëri’ në komunën e Podujevës, prej kohësh ka siguruar ngrohjen. Por, një fat të njëjtë nuk e ka edhe shkolla “Ibrahim Rugova” në këtë komunë, e cila sipas drejtuesve të saj, aktualisht po operon me rezerva nga viti i kaluar.
“Shkolla jonë është furnizuar me kohë me lëndë djegëse. Lëndë djegëse është peleti. Nuk kemi probleme me ngrohje, jemi të furnizuar deri në fund të gjysmë vjetorit të parë me lëndë djegëse mjaftueshëm’, tha Tafil Thaçi, drejtor i shkollës fillore ” Naim Frashëri” Podujevë
Por, një fat të njëjtë nuk e ka edhe shkolla “Ibrahim Rugova” në këtë komunë. “Aktualisht qëndrojmë mirë me ngrohje në institucion deri më tani, për shkak kushtet klimatike nuk kanë qenë shumë të ashpra, të ftohtit. Për vitin aktual nuk jemi furnizuar me lëndë djegëse, përveç që kemi rezerva nga viti paraprak. Edhe për disa ditë kemi lëndë mjaftueshme dhe po shpresojmë që nga dita e premte të furnizohemi për këtë vit shkollor”, tha për RTK.
Nga opozita vlerësojnë papërgjegjësi të ekzekutivit komunal për mosfurnizim në kohë të shkollave me lëndë djegëse.
“E dijmë gjithë që furnizimet e shkollave janë duke u bërë prej një shkolle në shkollën tjetër, pasi sivjet, nuk janë furnizuar me lëndë djegëse. Pra, është një zgjidhje për afat shkurtër deri sa kur e dijmë që nuk ka kontratë për furnizim me lëndë djegëse”, tha Qëndrim Softolli, asamblist i LDK-së në Podujevë.
Ndërkaq, drejtori komunal i Arsimit, Avni Fetahu, tha se të gjitha shkollat aktualisht kanë ngrohje.
“Ne kemi pasur një kontratë të lidhur, mirëpo, operatori ekonomik nuk iu ka përgjigjur ftesës për furnizim dhe kemi shkëput kontratën dhe e kemi marrë masën e sigurimit në vlerë prej 12 mijë eurove ashtu siç e parasheh ligji. Kemi zhvilluar procedurë të re dhe jemi në prag të njoftimit publik për operatorin më të lirë ekonomik, në mënyrë që të lidhet kontrata sipas procedurës ligjore siç e sheh prokurimi”, tha Avni Fetahu, drejtor Komunal i Arsimit në Podujevë.
Ai tha se aktualisht, komisioni ka bërë vlerësimin e ofertave me ç’rast i ka kërkuar dokumentet shtesë, siç e parasheh Ligji dhe sipas zyrës së Prokurimit, brenda 5 ditëve do të nënshkruhet kontrata me furnizuesin.
