Festivali i teatrit shqiptar “Moisiu”, i paraparë të niste pasnesër, është anuluar e shkak është bërë greva e aktorëve të Teatrit Kombëtar të Kosovës.
Anulimin e këtij festivali në programin e të cilit ishin paraparë 14 shfaqje teatrale që do të mbaheshin në qytetarët e tri shteteve, në Prishtinë, Tiranë, Shkup, Prizren, Korçë, Durrës, Gostivar, Kumanovë e Ferizaj, e bëri të ditur Ministria e Kulturës.
“Me dëshpërim të thellë ju njoftojmë që Festivali i teatrit shqiptar ‘Moisiu’, i paraparë të mbahej nga 20 deri më 27 Nëntor, do të anulohet për shkak të grevës së aktorëve të Teatrit Kombëtar të Kosovës”, thuhet në njoftimin e MKRS-së.
Aty thuhet se, ndonëse e respektojnë të drejtën e organizimit sindikal, kanë kërkuar nga Shoqata Sindikale e Aktorëve që ta kursejnë Festivalin “Moisiu”, por nuk kanë gjetur mirëkuptim nga sindikata.
“Andaj, në konsultim me Tiranën e Shkupin, përkundër përfundimit të të gjitha përgatitjeve programore dhe logjistike, jemi të detyruar të anulojmë festivalin, për të cilin u bënë shumë sakrifica që të arrinte në edicionin e tretë”, thuhet në njoftimin ministror.
