Kryetari i Lidhjes Demokratike të Kosovës, Lumir Abdixhiku, ka zhvilluar një tubim madhështor në Prizren, duke e cilësuar këtë ngjarje si një pikë kthese për partinë dhe qytetarët që kërkojnë ndryshim në gjithë Kosovën. Në fjalimin e tij emocionues, Abdixhiku theksoi entuziazmin dhe përkrahjen e madhe që po merr vizioni i LDK-së për një Kosovë të re, të bazuar në mirëqenie, dinjitet dhe unitet kombëtar.
“Ky turne është një momentum i artë për LDK-në dhe thirrjen tonë për ndryshim! Nga çdo qytet i Kosovës, po na bashkohen qytetarë të cilët shpresojnë dhe punojnë për një të ardhme më të mirë. Kjo nuk është vetëm një fushatë, por një thirrje për të ngritur Kosovën në nivelin që e meriton,” deklaroi Abdixhiku.
Në qendër të vizionit të tij është një Kosovë ku qytetarët kanë mundësi të barabarta për të ndjekur ëndrrat e tyre dhe për të ndërtuar një jetë me dinjitet, pranë familjeve dhe komuniteteve të tyre. Ai u zotua për një shtet që do të jetë prijetar në rajon, duke përmirësuar mirëqenien dhe duke ofruar mundësi për të gjithë.
“Dua ta shoh Kosovën jo si të fundit në rajon, por si një shtet krenar që udhëheq, ku uniteti kombëtar dhe zhvillimi ekonomik janë pjesë e përditshmërisë sonë,” theksoi ai.
Një moment kyç i takimit ishte prezantimi i kandidatëve të degës së Prizrenit për zgjedhjet e ardhshme: Driton Selmanaj, Anton Quni, Drita Millaku, Ajlin Shishko, Shaban Osmanaj dhe Xhavit Ukaj. Abdixhiku vlerësoi kandidaturat e tyre si përfaqësim i vlerave të LDK-së dhe si një ekip që do të kontribuojë në ndryshimin që kërkohet.
Abdixhiku mbylli fjalimin e tij me një thirrje të fuqishme për qytetarët: “Bëhuni ndryshimi! Kosova jonë ka potencial të jashtëzakonshëm, dhe vetëm së bashku mund ta realizojmë këtë vizion.”
Ky tubim konfirmon se LDK-ja po fuqizohet në terren, duke përforcuar pozicionin e saj si një forcë udhëheqëse për ndryshimet e nevojshme në vend. /Kosovatimes/
