Lideri i Lidhjes Demokratike të Kosovës (LDK), Lumir Abdixhiku, ka prezantuar në Vushtrri programin e partisë për arsimin, duke theksuar angazhimin për të, transformuar sistemin arsimor në vend. Mes pjesëmarrjes së shumtë të mësimdhënësve dhe profesionistëve të arsimit, Abdixhiku prezantoi masat kryesore që synojnë përmirësimin e infrastrukturës, kushtet për nxënësit dhe trajtimin e dinjitetshëm të mësimdhënësve.
“Një fëmijë në Kosovë qëndron vetëm gjysmë dite në shkollë. Kjo e bën të pabarabartë me bashkëmoshatarët e tij në Evropë. Nuk mund ta pranojmë këtë gjendje,” deklaroi Abdixhiku.
Masat Kryesore të Programit:
Mësimi gjithëditor: Zbatimi i modelit në pesë komuna të tjera përveç Prishtinës, duke ofruar orar të plotë, ushqime të ngrohta dhe kushte të përshtatshme për nxënësit.
Rritja e pagave për mësimdhënësit: Koeficienti 150 do të sigurojë një rritje mesatare prej 200 euro që në javën e parë të mandatit.
Investim në edukimin e hershëm: Ndërtimi i 80 çerdheve të reja për fëmijët nga mosha 3 vjeçe brenda katër viteve.
Digjitalizimi i shkollave: Pajisja e shkollave me tabela të mençura dhe sisteme të integruara digjitale për nxënësit, mësimdhënësit dhe prindërit.
Transparencë në rekrutimin e mësimdhënësve: Krijimi i Provimit Kombëtar për të eliminuar ndërhyrjet politike dhe për të siguruar punësim të drejtë për të rinjtë.
“Arsimi është prioriteti ynë dhe ndryshimi është misioni ynë,” theksoi Abdixhiku duke bërë thirrje për mbështetje të gjerë në zgjedhjet e ardhshme.
Programi i LDK-së për arsimin synon të sigurojë një të ardhme më të ndritur për brezat e rinj në Kosovë, duke e afruar vendin me standardet evropiane. /Kosovatimes/
