Trajneri i Borussia Dortmund, Nuri Sahin, e ka pranuar se Dinamo Zagreb ka cilësi, por ka thënë se skuadra e drejtuar nga ai është gati.
Dy skuadrat do të përballen të mërkurën në një sfidë në Champions League. Dortmund ndodhet aktualisht në vendin e njëmbëdhjetë të të tabelës, ndërsa Dinamo mban vendin e nëntëmbëdhjetë.
Sahin në një konferencë për shtyp të martën ka folur për skuadrën e drejtuar nga Nenad Bjelica.
“Kemi parë shumë ndeshje të Dinamos. Kanë fituar shtatë pikë në mënyrë mbresëlënëse. Mund të vëresh ndikimin e trajnerit, është një ekip që pasqyron idetë e tij. Kanë disa lojtarë të fortë dhe emra të mëdhenj”, ka thënë ai.
Sahin ka nënvizuar se Dortmundi nuk do të devijojë nga strategjia e tij.
“Nuk duam të largohemi nga ideja jonë. Duam të kontrollojmë topin dhe të luajmë futboll. Por jemi gati”, është shprehur ai.
Në aspektin e përbërjes së ekipit, Sahin e ka konfirmuar mungesën e Niklas Sule dhe Karim Adeyemi, por ka thënë se Emre Can dhe Serhou Guirassy kanë udhëtuar me skuadrën dhe janë të gatshëm për ndeshjen.
Kjo do të jetë hera e parë që Dortmund përballet me një ekip kroat në garat evropiane. Ndeshja do të zhvillohet në stadiumin “Maksimir”, i njohur për atmosferën e tij të zjarrtë, por Sahin ka thënë se skuadra e tij është e përgatitur për çdo sfidë që mund të vijë nga tribuna.
“Ajo që ndodh në tribuna nuk ka rëndësi të madhe. Lojtarët e shijojnë. Skuadra jonë operon në nivelin më të lartë. Ata kanë parë dhe përjetuar shumë”, ka thënë ai, duke shtuar se edhe Dortmundi ka një atmosferë unike në stadiumin e tij.
