Policia e Kosovës ka bërë të ditur se ka arrestuar të mërkurën 20 persona në katër qytete të Kosovës pas hetimeve disamujore të Prokurorisë Speciale.
Siç ka njoftuar Policia, aksioni është zhvilluar në Prishtinë, Ferizaj, Kaçanik dhe Klinë. Personat e arrestuar dyshohen se kanë kryer veprat penale “Hyrja e paautorizuar kompjuterike” dhe “Mashtrimi”.
Gjatë këtij operacioni janë sekuestruar prova relevante si para të gatshme rreth 120,000.00 euro, pesë vetura ,janë ngrirë mjete financiare nëpër banka në Kosovë, si dhe prona të paluajtshme,30 kompjuter, 30 telefona, pajisje memorizuese,dokumente dhe prova tjera relevante për rastin, etj.
Sipas njoftimit të Policisë, në zbatimin e planit operativ kanë marrë pjesë rreth 120 zyrtarë policorë. Ka pasur edhe zyrtarë gjermanë.
“Në zbatimin e planit operativ kanë marrë pjesë rreth 120 zyrtarë policorë (DHKK, DHKEK, DHKOKR, DHTN, DHTNj, DKT, NjSO, NjRSh, dhe Krimteknika-vendi i ngjarjes). Gjithashtu, në operacion kanë marrë pjesë edhe zyrtarë gjerman, prokurorë dhe zyrtarë policorë”, thuhet në njoftim.
Me urdhër të Prokurorit nga Prokuroria Speciale, 10 të dyshuar dërgohen në mbajtje prej 48 orëve, ndërsa 10 të dyshuar të tjerë lirohen në procedurë të rregullt. /Kosovatimes/
