Leicester City ka emëruar Ruud van Nistelrooy si trajner të ri të skuadrës, duke i besuar atij drejtimin e ekipit në një periudhë kritike për klubin.
Dyzet e tetë vjeçari ka nënshkruar një kontratë deri në qershor 2027, duke pasuar Steve Cooper, i cili është shkarkuar pas një serie rezultatesh zhgënjyese.
Leicester për momentin renditet në vendin e gjashtëmbëdhjetë në Premier League, vetëm një pikë larg zonës së rënies.
Pavarësisht sfidave, kryetari i klubit, Aiyawatt Srivaddhanaprabha, ka shprehur besimin në aftësitë e trajnerit të ri.
“Është kënaqësi ta mirëpresim Ruud në Leicester City. Ai sjell përvojë, mentalitet fitues dhe një vizion të qartë për sukses. Ne jemi të emocionuar për ndikimin që ai mund të ketë ndërsa fillojmë këtë kapitull të ri”, ka thënë ai.
Emërimi i Van Nistelrooy vjen pak javë pas largimit të tij nga roli i trajnerit të përkohshëm te Manchester United, ku gjatë drejtimit të shkurtër, holandezi arriti tri fitore dhe një barazim, duke përfshirë dy fitore kundër Leicester.
Kjo është eksperienca e dytë e plotë e Van Nistelrooy si trajner pas kohës së tij te PSV Eindhoven, ku e kishte fituar Kupën e Holandës në sezonin 2022/23. Megjithatë, ai ishte larguar para përfundimit të sezonit.
Në Leicester, ai merr drejtimin pas largimit të Steve Cooper, i cili ishte shkarkuar pas humbjes 2-1 ndaj Chelsea.
