Aleatët e NATO-s duhet të rrisin ndihmën ushtarake për Ukrainën në mënyrë që të forcojnë pozicionin e Kievit nëse autoritetet ukrainase hyjnë në negociata me Moskën për t’i dhënë fund luftës, tha sot Sekretari i Përgjithshëm i Aleancës, Mark Rutte, përpara takimit të krerëve të diplomacinë e vendeve të NATO-s.
“Ne të gjithë duhet të bëjmë më shumë. Sa më e fortë të jetë ndihma jonë ushtarake për Ukrainën tani, aq më e fortë do të jetë forca e tyre në tryezën e bisedimeve,” tha ai, sipas Reuters.
Siç u tha Rutte gazetarëve në Bruksel, presidenti rus Vladimir Putin nuk është i interesuar për paqen.
“Ai vazhdon, përpiqet të pushtojë më shumë territor sepse mendon se mund të thyejë vendosmërinë tonë dhe ukrainase, por e ka gabim”, theksoi ai.
Takimi i NATO-s në Bruksel: Fokusimi në mbështetjen për Ukrainën
Ministrat e Jashtëm të 32 vendeve anëtare të NATO-s do të takohen sot në Bruksel për takimin e fundit të nivelit të lartë përpara se presidenti i sapozgjedhur amerikan Donald Trump të marrë detyrën në janar.
Në takimin, temë kryesore e të cilit do të jetë mbështetja për Ukrainën, shkruan Deutsche Welle me vlerësimin se ka “probabilitet të ulët” që Ukraina të marrë sot ftesë për anëtarësim në NATO.
Edhe pse sot nuk do të merret një vendim përfundimtar për këtë çështje, burime diplomatike besojnë se do të duhen disa javë apo muaj për të arritur një konsensus mes anëtarëve.
Sekretari amerikan i Shtetit Anthony Blinken njoftoi se takimi do të diskutojë prioritetet e sigurisë transatlantike, duke përfshirë mbështetjen për Ukrainën në luftën e saj kundër Rusisë.
