Sipas Prokurorisë, dyshohet se deputeti Dogjani në dokumentet e deklarimit të pasurisë ka paraqitur një kontratë fiktive të blerjes së një apartamenti në vitin 2006. Sipas kontratës banesa është përfituar në këmbim të konsulencave juridike që i kishte ofruar dhe do t’i ofronte në të ardhmen, shoqërisë që kishte ndërtuar pallatin.
Por në të kundërt, Prokuroria rezulton të ketë zbuluar kontratën origjinale sipas së cilës pagesa e apartamentit është bërë në cash nga deputeti, dhe se veprimet e tij kanë pasur si qëllim, deklarimin e rremë të burimit të krijimit të pasurisë së paluajtshme.
Vetë zoti Dogjani në deklarimet e tij publike, nuk ka dhënë ndonjë shpjegim, por ka folur për një hetim me prapavijë politike ndaj tij.
Po sot Prokuroria e Posaçme i komunikojë akuzën e shpërdorimit të detyrës dhe kryebashkiakut socialist të Devollit Edurad Duro. Ai dyshohet se ka licencuar një pikë karburanti në zonën e Bilishtit, e cila ishte një ndërtim pa leje. Zoti Duro i ka mohuar akuzat dhe tha sot se do të vijojë të qëndrojë në detyrë, ndonëse është i pandehur.
