Ministri i Punëve të Brendshme Xhelal Sveçla po qëndron në Emiratet e Bashkuara Arabe aty ku është pritur nga zëvëndëskryeministri dhe ministri i Brendshëm i Emirateve të Bashkuara Arabe, Sheikh Saif bin Zayed Al Nahyan me të cilin ka nënshkruar marrëveshjen e njohjes së ndërsjellë të patentë shoferëve mes Republikës së Kosovës dhe Emirateve të Bashkuara Arabe.
Sipas Sveçlës kjo marrëveshje do të lehtësojë punën dhe angazhimin qytetarëve në shtetet përkatëse.
“Biseduam me Lartësinë e Tij Sheikh Saif bin Zayed Al Nahyan për mundësitë e bashkëpunimit në fushat tjera që mbulojnë ministritë tona dhe gjej rastin ta falënderoj sërish për gatishmërinë e plotë për mbështetje ndaj Republikës së Kosovës”, ka shkruar ministri i Brendshëm.
Ai ka falënderuar ekipet punuese të dy shteteve që arritën ta finalizojnë këtë marrëveshje. /Kosovatimes/
