Trajneri i Tottenham Hotspur, Ange Postecoglou, ka shprehur kënaqësinë për përparimin e ekipit të tij këtë sezon, duke theksuar përmirësimet në të gjitha aspektet e lojës, pavarësisht disa rezultateve të dobëta.
“Po përparojmë në të gjitha aspektet e lojës sonë”, ka thënë Postecoglou. “Kemi shënuar shumë gola, por edhe nga ana mbrojtëse jemi shumë më të qëndrueshëm se vitin e kaluar”.
Trajneri australian ka vlerësuar punën e skuadrës, duke pranuar sfidat e shkaktuara nga mungesat e lojtarëve kyç. “Fakti që kemi disa mungesa të rëndësishme është diçka që duhet ta përballojmë. Kishim një situatë të ngjashme vitin e kaluar dhe mund të them se e kaluam me shumë përpjekje, gjë që po bëjmë edhe tani”, ka shtuar ai.
Megjithatë, Postecoglou nuk e ka fshehur faktin se ka ende vend për përmirësime. Ai ka veçuar dy ndeshjet kundër Crystal Palace dhe Ipswich, ku skuadra nuk ishte në nivelin e pritshëm.
“Kemi pasur disa ndeshje ku nuk kemi qenë në nivelin e duhur në zbatimin e lojës sonë. Veçanërisht në dy ndeshjet kundër Palace dhe Ipswich kemi qenë larg pritshmërive tona”, ka thënë ai.
Trajneri ka siguruar tifozët se klubi po punon për të përmirësuar këto aspekte, duke theksuar se përparimi është i dukshëm në të gjitha fushat e lojës.
“Spurs” ndeshet të enjten me Bournemouth.
Në tabelën e kryesuar nga Liverpool, Tottenham gjendet në pozitën e shtatë.
