Në Ditën Ndërkombëtare të Vullnetarizmit, Kryeministri i Kosovës, Albin Kurti, shprehu mirënjohjen e tij të thellë ndaj të gjithë vullnetarëve që angazhohen për të ndihmuar komunitetin.
“Vullnetarizmi nuk është vetëm një akt ndihme, por edhe një thirrje për solidaritet dhe ndërtimin e një shoqërie më të drejtë dhe më humane,” tha Kurti.
Ai njoftoi se Qeveria e Republikës së Kosovës është duke hartuar Koncept Dokumentin për Vullnetarizmin, një projekt i përbashkët me shoqërinë civile. Ky dokument synon të nxisë dhe promovojë kulturën e vullnetarizmit në vend, duke krijuar mundësi për angazhime me ndikim të qëndrueshëm.
Kryeministri e cilësoi vullnetarizmin si frymëzim dhe shpresë, duke theksuar rëndësinë e bashkëpunimit për një të ardhme më të mirë për të gjithë.
“5 dhjetori është një përkujtim për rëndësinë e përbashkimit dhe kontributit të secilit prej nesh,” tha ai duke uruar qytetarët për Ditën Ndërkombëtare të Vullnetarizmit.
“Faleminderit të gjithë vullnetarëve që kontribuoni për një shoqëri më të mirë!”, përfundoi Kurti. /Kosovatimes/
