Federata e Futbollit e Kosovës (FFK), në bashkëpunim me Shoqatën e Gazetarëve Sportivë të Kosovës (ShGSK), ka nisur procesin për përzgjedhjen e futbollistit më të mirë të Superligës së Kosovës për vitin 2024.
Sikurse në vitet e kaluara, FFK i ka besuar ShGSK-së organizimin dhe administrimin e këtij votimi prestigjioz. Gazetarët sportivë nga redaksitë e ndryshme janë të ftuar të votojnë për 10 futbollistët më të mirë të Superligës, duke i vlerësuar nga nota minimale 1 deri tek ajo maksimale 10.
Afati i fundit për dërgimin e votave është e hëna, më 9 dhjetor 2024, deri në orën 18:00. Rezultatet e votimit do të shpallen gjatë një ceremonie zyrtare të organizuar nga FFK, ku do të ndahen edhe çmime të tjera për performancën e shkëlqyer në futbollin kosovar gjatë vitit.
Ky proces vlerëson jo vetëm aftësitë individuale të futbollistëve, por edhe kontributin e tyre për ekipet dhe zhvillimin e përgjithshëm të futbollit në vend. /Kosovatimes/
