E ardhmja e Kevin De Bruyne te Manchester City mbetet në pikëpyetje, ndërsa kontrata e tij aktuale përfundon vitin e ardhshëm.
Trajneri Pep Guardiola, në një deklaratë për mediat, nuk ka dhënë asnjë detaj rreth mundësisë së rinovimit të kontratës së mesfushorit belg, duke lënë të hapura spekulimet për një largim të mundshëm.
“Ka lojtarë që ndikimi i tyre në këtë klub do të jetë i përjetshëm. Sigurisht që nuk është e lehtë t’i zëvendësosh, por, nëse kjo ndodh, si klub duhet të gjejmë zgjidhjen më të mirë”, ka thënë Guardiola.
De Bruyne ishte në formë të shkëlqyer në fitoren 3-0 të City ndaj Nottingham Forest të mërkurën, ku ka shënuar një gol dhe ka asistuar një tjetër. Megjithatë, forma e përgjithshme e ekipit ka qenë zhgënjyese deri tash, duke u gjendur vetëm në vendin e katërt në tabelën e Premier League: nëntë pikë pas Liverpool që kryeson dhe dy pikë larg Chelsea e Arsenal.
Për Manchester City, kalendari i ngjeshur i dhjetorit paraqet sfida të mëdha, me gjashtë ndeshje në të gjitha kompeticionet. Pas përballjes së fundjavës kundër Crystal Palace, skuadra do të udhëtojë në Itali për t’u përballur me Juventusin në Champions League të mërkurën e ardhshme.
