Duke folur për incidentet e mundshme të mbrëmjes së sotme dhe çfarë u diskutua në seancën e Këshillit të Sigurisë Kombëtare, ai thotë se ka dhënë urdhra, por ende nuk ka bërë publike se cilat ishin ato. Nisur nga deklaratat e tij, bëhet fjalë për ngritjen e gatishmërisë luftarake.
“Ne kemi marrë masa në përputhje me rrethanat, kam lëshuar urdhra të duhur… Më duhet të lavdëroj ushtrinë dhe policinë tonë, asnjëherë që nga ekzistenca e APJ-së nuk kemi pasur një disponim të tillë të ushtrisë dhe policisë për t’u vënë në dispozicion të atdheut ata marrin çdo urdhër, përveç alarmit dhe gatishmërisë luftarake, para kësaj ne do të përpiqemi të ruajmë paqen”, tha Vuçiq.Ambasadat e SHBA-së në Beograd dhe Prishtinë u kanë kërkuar serbëve që të heqin barrikadat që kanë vendosur në shenjë proteste ndaj arrestimit të një ish-pjesëtari të policisë së Kosovës, i cili dha dorëheqjen muajin e kaluar së bashku me serbët e tjerë. Atë e ka komentuar Aleksandar Vuçiq.
Më pas ai ka theksuar se sot është dita më e vështirë për të, dhe se ndoshta po përballet me natën më të vështirë që kur ka qenë president i Serbisë. Ai u bëri thirrje shqiptarëve dhe serbëve që të ruajnë paqen, e veçanërisht serbët të mos bien në provokime.
“Kur i pyet ata (autoritetet e Kosovës) se ku në marrëveshje shkruhet se mund të krijojnë njësitë e tyre policore dhe të pushtojnë veriun si të duan, ata thonë “epo kjo është në frymën e marrëveshjes”. Është njësoj si me Dejtonin, nuk është shkruar askund, por është në frymën e Dejtonit”, tha Vuçiq.
Ai ka komentuar edhe sulmin në bazën e EULEX-it në të cilin nuk ka të lënduar, por nga BE-ja ka ardhur një paralajmërim se nuk do të lejojë sulme të tilla. Vuçiq thotë se nuk kanë prova për sulmin dhe se shumë besojnë se ai është i sajuar, por pavarësisht kësaj, sulmet nuk guxojnë të ndodhin.
