Një nga sportet e rralla, siç është mundja e duarve, ka bërë që shqiptari nga Kosova, Leotrim Bytyqi, të shquhet si një kampion i pamposhtur.
Në turnetë e zhvilluara në Gjermani dhe Zvicër, në kategorinë deri në 110 kg, Leotrimi nuk ka humbur asnjë garë. Ai gjen motivim tek emblema e Ushtrisë Çlirimtare të Kosovës, të cilën e mban me krenari në fanellën e tij në çdo garë.
Leotrimi, i lindur në Suharekë, tash e tetë vjet jeton në Gjermani, ku përpos angazhimeve të tij të përditshme, ka ndjekur me përkushtim sportin e mundjes së duarve. Deri më tani, ai ka fituar katër turne, duke zënë vendin e parë me të dy duart.
Së fundmi, ai ka marrë titullin “Kampion i Gjermanisë në kategorinë deri në 110 kg.” Garat ai i zhvillon jo vetëm në Gjermani, por edhe jashtë saj, duke afirmuar një sport të rrallë dhe të veçantë.
