Në një letër të hapur drejtuar ish-kryeministrit dhe kryetarit të AAK-së, Ramush Haradinaj, Hysen Gecaj, një qytetar i angazhuar në mbrojtje të interesave kombëtare, ka shprehur shqetësimin e tij lidhur me vendimin e Haradinajt për bashkëpunim me Demokracinë Konservatore.
Gecaj thekson se ky vendim bie ndesh me qëndrimet e mëparshme të Haradinajt, i cili dikur ka kritikuar ashpër grupet dhe lëvizjet që tani po mbështet. Në letrën e tij, ai përmend frazën “flliqana” që Haradinaj ka përdorur për të përshkruar këto figura dhe lëvizje, duke pyetur: “Si ndodhi që tani u bëtë aleat me Demokracinë Konservatore?”
Letra gjithashtu kritikon pjesëmarrjen e Haradinajt në promovimin e librit “Kauza për Familje,” të cilin Gecaj e cilëson si një ironi për një popull që gjithmonë ka pasur vlera të forta familjare.
“Ne nuk bëmë luftë fetare. Ne luftuam për liri, për një shtet ku të gjithë kanë të drejtën e besimit të tyre, por ku kombi dhe shteti nuk mund të përdoren si instrumente për interesa të huaja,” shkruan Gecaj, duke aluduar në rreziqet që vijnë nga agjendat e dyshimta që fshihen pas disa grupimeve fetare.
Ai e sfidon Haradinajn për konsistencën e parimeve të tij dhe i kërkon të reflektojë mbi pasojat që këto veprime mund të kenë për shtetin dhe për trashëgiminë e tij politike.
“Ndoshta veprime të tilla mund t’ju sjellin disa vota, por ju rrezikoni të humbisni respektin e atyre që e vendosin kombin mbi gjithçka,” përfundon Gecaj, duke apeluar për një rikthim tek vlerat dhe parimet që kanë udhëhequr Haradinajn si një luftëtar dhe lider.
Letra është një thirrje publike për reflektim duke nënvizuar rëndësinë e mbrojtjes së karakterit laik të shtetit të Kosovës dhe ruajtjen e integritetit kombëtar. /Kosovatimes/
