Kryetari i Komitetit Olimpik të Kosovës, Ismet Krasniqi, ka thënë se për një dekadë të qenit anëtar në Komitetin Olimpik Ndërkombëtar, Kosova ka arritur më shumë se sa që mendohej.
Ai ka folur në ceremoninë e organizuar për të shënuar dhjetëvjetorin e anëtarësimit të Kosovës në KON.
“Gjatë këtyre dhjetë viteve, e dimë se rruga nuk ka qenë gjithmonë e lehtë, ka pasur sfida dhe dyshime, por mbi të gjitha ka pasur besim dhe guxim”, ka thënë Krasniqi. Ai ka theksuar se pavarësisht se Kosova është vend i vogël ka dëshmuar se ka potencial të madh, një shpirt të pamposhtur dhe ambicie të mëdha.
Krasniqi ka përmendur arritjet e jashtëzakonshme të sportistëve kosovarë gjatë kësaj periudhe: pesë medalje olimpike, katër medalje në Lojërat Evropiane, triumfe në Lojërat Mesdhetare, si dhe sukseset në kampionatet botërore dhe evropiane. “Këto janë dëshmi se kur besojmë në veten tonë, asnjë kufi nuk është i pamundur. Ne kemi dëshmuar se mund të arrihet gjithçka, ndoshta edhe më shumë sesa kemi menduar, vetëm duke pasur besim dhe duke punuar me përkushtim”, ka thënë ai.
