Deri nesër në ora 16:00 është i hapur afati për subjektet politike të cilat duan të certifikohen për garën zgjedhore të 9 shkurtit. Ndërkaq 24 orë para mbylljes së këtij afati në institucionin që organizon zgjedhjet kanë shkuar pesë aplikime për certifikim nga 5 subjekte politike, 4 prej tyre parti e 1 iniciativë qytetare.
Sipas zëdhënësit të KQZ-së, Valmir Elezi, numri i përgjithshëm i kandidatëve për deputetë, që përfaqësojnë këto subjekte politike, është 122 kandidatë.
Sipas KQZ-së subjektet politike që kanë paraqitur aplikimin e tyre janë, Partia Rome e Bashkuar e Kosovës me 35 kandidatë. Një tjetër subjekt politik që aplikoi në KQZ është edhe Jednstvena Goranska Partija me 29 kandidatë në listë zgjedhore. Aplikim pati edhe nga Partia e Ashkalinjve për Integrim me 35 kandidatë. Srpska Demokratija me 13 kandidatë dhe Narodna Pravda me 10 kandidatë.
Deri nesër në ora 16:00, subjektet politike duhet të dorëzojnë edhe listat e tyre me emrat e kandidatëve për deputetë.
