Dështimi i vazhdueshëm i punës së Komisioneve Hetimore Parlamentare ka ngritur nevojën për ndryshimin e Ligjit për Hetim Parlamentar.
Me rastin e publikimit të raportit “Mosefikasiteti i hetimit parlamentar”, nga Instituti i Kosovës për Drejtësi u tha se puna e komisioneve hetimore është përcjellë me përplasje pozitë-opozitë.
Naim Jakaj, hulumtues i lartë në IKD tha se deri më tani janë themeluar 15 komisione hetimore parlamentare.
“Një prej mekanizmave të kontrollit të qeverisë nga ana e opozitës janë komisionet hetimore. Në 23 vite nga konstituimi i Kuvendit janë krijuar gjithsej 15 komisione hetimore parlamentare. Megjithatë shumica nuk kanë arritur qëllimin kryesor – zbardhjen e fakteve. Komisionet Hetimore kanë ndërtuar një kulturë të konfrontimit që është përcjellë me përplasje”, tha ai.
Ndërsa, deputeti i LDK-së, Driton Selmanaj fajësoi mazhorancën për dështim të themelimit të disa komisioneve hetimore parlamentare.
“Ne duhet ta kryejmë pjesën politike të ekspertizës tonë në bazë të informatave që marrin nga njerëz që vijnë për të na raportuar. Ne kemi pasur tri kërkesa për komisione hetimore së fundmi. E para për mostrat e Astrit Deharit, një për kontratat njëburimore dhe e treta me faljen e borxheve të ambalazhuesve të ujit. Të tria Lëvizja Vetëvendosje nuk i ka votuar në Kuvendin e Kosovës. Hetimi parlamentar është i nevojshëm. Demokracia është e vlefshme si në opozitë si kur jemi në pozitë”, deklaroi ai.
Ndërsa, deputeti i AAK-së, Shemsedin Dreshaj ngriti nevojën për ndryshim të Ligjit për Hetim Parlamentar.
“Ne, në këtë mandat jo që nuk kemi pasur promovim, por anashkalim, kërcënim dhe bllokim. Shumica e Komisioneve Hetimore Parlamentare që pozita nuk ka dashur të themelohen, nuk janë themeluar”, theksoi Dreshaj.
Pozitë e opozitë vazhdimisht kanë fajësuar njëra-tjetrën për dështim të punës së komisioneve hetimore parlamentare.
