KQZ-ja njofton se ka zgjatur afatin për aplikim të subjekteve politike për certifikim dhe për dorëzimin e listës së kandidatëve për deputetë për pjesëmarrje në zgjedhjet 9 shkurtit.
“Komisioni Qendror i Zgjedhjeve ka zgjatur afatin për aplikim të subjekteve politike për certifikim dhe për dorëzimin e listës së kandidatëve për deputetë për pjesëmarrje në Zgjedhjet për Kuvendin e Kosovës, të cilat do të mbahen më 9 shkurt 2025, deri në orën 23:59 të ditës së sotme, e mërkurë, 11 dhjetor 2024.
Sipas njoftimit këtë vendim, KQZ e mori gjatë mbledhjes së sotme duke pasur në konsideratë se për herë të parë ky proces realizohet përmes platformës online http://certifikimi.kqz-ks.org dhe disa nga subjektet politike kanë pasur vështirësi në përdorimin e platformës.
Dhjetë subjekte kanë aplikuar për certifikim, sot përmbyllet afati
Dhjetë subjekte politike kanë aplikuar për certifikim deri tash kur kanë mbetur pak kohë para përmbylljes zyrtare të afatit të përcaktuar nga KQZ-ja për aplikim të subjekteve politike për t`u certifikuar që të jenë pjesëmarrës në zgjedhjet e 9 shkurtit në Kosovë.
Menjëherë të gjithë emrat e listës së kandidatëve që këto subjekte politike kanë paraqitur në KQZ, janë dërguar për verifikim në KGJK ashtu siç e kërkon ligji për Zgjedhjet e Përgjithshme në mënyrë që ata të mund t’i hyjnë garës zgjedhore.
Kjo u bë e ditur në mbledhjen e KQZ-së ku gjithashtu u bë e ditur se deri sot në ora 09:00 të paradites si regjistrues jashtë vendit kanë aplikuar 32 mijë e 646 votues prej tyre 30 mijë 656 janë aprovuar, 1990 janë refuzuar e 887 janë anuluar.
Ndërkohë në këtë mbledhje PDK-ja pyeti Drejtorin e Zyrës për Regjistrim, Certifikim dhe Kontrollim Financiar të Subjekteve Politike nëse ka të dhëna lidhur me fahun postal nga MPJ-ja meqë sipas tij, subjekteve politike u duhet që sa më parë t’i kenë edhe vëzhguesit që do t’i gjejnë në vendet ku janë bashkatdhetarët.
Por, ai tha se deri në këto momente nuk kanë pranuar ndonjë njoftim lidhur me procedimin për hapjen e këtyre kutive postare edhe pse prej një jave u kanë dërguar e-mail MPJD-së, por nuk kanë marr përgjigje.
