Analisti Shenoll Muharremi ka reaguar ndaj një video-adresimi të Kryeministrit të Kosovës, ku ky i fundit bëri thirrje për një pjesëmarrje të gjerë të diasporës në zgjedhje, duke e cilësuar këtë si “demokratike” dhe “të rëndësishme”. Muharremi ka kritikuar këtë qasje, duke theksuar se një pjesë e madhe e diasporës nuk ka ndikim të drejtpërdrejtë në jetën e përditshme të Kosovës dhe se këto thirrje shpeshherë vijnë për interesa të politikanëve, jo për respekt ndaj demokracisë apo qytetarëve.
Ai theksoi se deri tani, vetëm 33,000 persona nga diaspora janë regjistruar për votim, një shifër që përbën rreth 3.3% të votuesve potencialë. Sipas tij, ky është një rezultat normal, pasi shumica e diasporës është më e fokusuar në jetën dhe punën në vendet ku jetojnë, sesa në politikën e Kosovës. “Njerëzit në Gjermani, Zvicër, Itali e Austri janë të angazhuar me punën e tyre dhe nuk kanë shumë kohë të merren me partitë politike të Ballkanit,” tha Muharremi.
Thirrja Kurtit për mërgimtarët: Nga çdo cep i botës ku je, hidhe votën për atdhe
Muharremi gjithashtu vuri në dukje se thirrjet për votim nga diaspora shpesh bëhen vetëm gjatë periudhës së zgjedhjeve, duke lënë të kuptohet se motivet kryesore janë mbledhja e votave. Ai vlerësoi kontributin e jashtëzakonshëm të diasporës në ekonominë e Kosovës dhe ndihmat e tyre ndër vite, por theksoi se votimi duhet të jetë një akt vullnetar dhe jo një detyrim moral.
“Thirrjet e politikanëve duhet të fokusohen tek votuesit që jetojnë në Kosovë, sepse ata janë ata që preken drejtpërdrejt nga veprimet dhe politikat e qeverisë. Diaspora ka dhënë dhe vazhdon të japë një kontribut të madh, por nuk ka nevojë të shqetësohet për zgjedhjet – më mirë ta shfrytëzojë atë ditë pushimi me familjet e veta,” përfundoi ai.
Muharremi i bëri thirrje diasporës të vazhdojë të kontribuojë si deri tani, përmes integrimit dhe mbështetjes ekonomike, duke e cilësuar këtë si respektin më të madh që mund t’i bëhet Kosovës. /Kosovatimes/
