Presidenti i zgjedhur i SHBA-së, Donald Trump tha të hënën se Turqia do të “mbajë çelësin” për atë që ndodh në Siri, ku rebelët e mbështetur nga Ankaraja rrëzuan qeverinë e Bashar al-Asad në fillim të këtij muaji.
Duke bërë komentet e tij të para se si e sheh rolin e aleatit të NATO-s në Sirinë e pas konfliktit, Trump vlerësoi atë që ai e përshkroi si “forcën e madhe ushtarake” të Turqisë, të cilën ai tha se “nuk është lodhur nga lufta”, shkruajnë mediat e huaja.
Që nga rrëzimi i Assadit, Uashingtoni dhe Ankaraja thuhet se kanë zhvilluar bisedime për t’iu kundërvënë çdo ringjalljeje të militantëve të Shtetit Islamik në Siri.
Uashingtoni ka mbajtur rreth 900 trupa në Sirinë lindore si një mbrojtje kundër militantëve.
I pyetur se çfarë do të bëjë ai me ato trupa, Trump ishte i paqartë, duke vënë në dukje fuqinë e ushtrisë turke dhe duke theksuar marrëdhënien e tij me presidentin turk, Recep Tajip Erdogan.
“Erdogani është dikush me të cilin kam marrëdhënie të mira… Ai ka ndërtuar një ushtri shumë të fortë dhe të fuqishme”, ka thënë më tej Trump.
