Kryetari i Lidhjes Demokratike të Kosovës (LDK), Lumir Abdixhiku, ka prezantuar sot në Lipjan programin dhe zotimet për Siguri, Mbrojtje dhe Drejtësi, në kuadër të Takimit të 6-të Tematik. Abdixhiku u shpreh se ndërkohë që “të tjerët propagandojnë”, LDK fokusohet në ide dhe projekte konkrete për të ardhmen që i duhet Kosovës.
Abdixhiku theksoi rëndësinë e tri shtyllave kryesore – Sigurinë, Drejtësinë dhe Mbrojtjen – duke prezantuar propozime që synojnë transformim rrënjësor në këto fusha.
Në Siguri, ai premtoi: Ristrukturimin e Policisë me 10,000 policë në uniformë, duke shtuar mbi 2,000 policë më shumë se aktualisht; Pajisjen e policisë me 1,200 vetura të reja dhe kamera trupore për të gjitha patrullat dhe Promovimin e policimit në bashkësi për të fuqizuar bashkëpunimin qytetar.
Në Mbrojtje, propozimet përfshijnë: Partneritetin për Paqe si hap drejt anëtarësimit në NATO; rritjen e shpenzimeve të mbrojtjes në 2% të BPV-së, sipas standardeve të NATO-s; ristrukturimin e FSK-së me 6,000 trupa aktive dhe ndërtimin e katër kazermave të reja ushtarake; arsimimin ushtarak në shkolla civile për përgatitjen e rekrutëve të rinj dhe ndërtimin e vendbanimeve për personelin ushtarak, për një reagim më të shpejtë.
Në Drejtësi, Abdixhiku propozoi: Veting të plotë në sistemin e drejtësisë; themelimin e Qendrës Shtetërore të Hetimit për luftimin e korrupsionit dhe krimit të organizuar dhe digjitalizimin e plotë të proceseve në drejtësi për efikasitet dhe transparencë.
“Me programin tonë të qartë, me projekte konkrete dhe me mbështetjen e qytetarëve, do ta ndërtojmë një të ardhme më të sigurt dhe të drejtë për Kosovën,” deklaroi Abdixhiku.
Ky takim u mbajt në komunën e Lipjanit, e drejtuar nga Imri Ahmeti, ku Abdixhiku tha se LDK është gati të sjellë ndryshimin e nevojshëm për vendin. /Kosovatimes/
