POlicia ka bërë të ditur se disa persona janë arrestuar mbrëmjen e së martës në Prishtinë në dy raste të ndara, ku janë sekuestruar tri armë zjarri dhe një sasi e konsiderueshme municioni.
Policia ka njoftuar se në “Rrugën B”, një automjet kishte tentuar t’i shmangej ndalimit policor, e pasi është arritur të ndalohet, dy personave iu janë gjetur armë zjarri. Ndërsa, në rastin e dytë autoritetet policore kanë zhvilluar një operacion në një lokal në rrugën “Kadri Zeka” në lagjen “Kalabria” në Prishtinë, me ç’rast është ndaluar një i dyshuar dhe është sekuestruar një armë zjarri.
Rastet po trajtohen si “mbajtje në pronësi, kontroll ose posedim i paautorizuar i armës”. Personat e dyshuar janë në qendrën e mbajtjes për 48 orë.
“I kujtojmë publikut se mbajtja pa leje e armëve të zjarrit është një vepër penale dhe policia do të vazhdojë të ndërmarrë veprime të shpejta dhe rigoroze për të garantuar sigurinë e komunitetit tonë. Në të njëjtën kohë i bëjmë thirrje publikut të raportojë çdo aktivitet të dyshimtë për të na ndihmuar në misionin tonë për të ruajtur paqen dhe sigurinë”, thekson policia.
