Arsenal ka triumfuar me rezultat 3-2 ndaj Crystal Palace në një ndeshje dramatike të zhvilluar në stadiumin “Emirates”, duke siguruar kalimin tutje në EFL Cup.
Pavarësisht se Palace ka kaluar në epërsi që në minutën e katërt me një gol të Jean-Philippe Mateta, skuadra e Mikel Arteta ka reaguar në pjesën e dytë, falë një paraqitje të jashtëzakonshme të Gabriel Jesus.
Arsenal e ka dominuar zotërimin e topit gjatë pjesës së parë, por pa arritur të gjejë rrugën e golit. Megjithatë, në pjesën e dytë, Jesus e ka marrë përgjegjësinë dhe e ka ndryshuar fatin e ndeshjes.
Braziliani e ka barazuar rezultatin në minutën e pesëdhjetë e katërt, duke rikthyer shpresat te tifozët e Arsenal. Në minutën e shtatëdhjetë e tretë, ai ka shënuar golin e avantazhit pas një aksioni të mirë të skuadrës. Ndërsa në minutën e tetëdhjetë e një, Jesus e ka kompletuar tripletën e tij duke vulosur fitoren e “Topçinjve”.
Crystal Palace ka arritur ta ngushtojë diferencën në minutën e tetëdhjetë e pestë, falë një goli Nketiah, por nuk ka mundur ta shmangë humbjen.
