Nënkryetarja dhe deputetja e LDK-së, Hykmete Bajrami, ka reaguar ashpër ndaj deklaratave të deputetit Driton Gola në emisionin “Frontal” në T7, ku ky i fundit përsëriti akuzat e partisë së tij për doracakët në arsim.
Bajrami sqaroi se nuk ekziston asnjë vendim në emrin e saj për miratimin e doracakëve, duke theksuar se dokumenti i përmendur nga Gola është vetëm një kërkesë për miratim dhe jo një vendim. “Kërkesë jo vendim, kanë dallim këto, profesor Gola,” deklaroi ajo.
Ajo akuzoi partinë e Gola për shpifje dhe mashtrime, duke paralajmëruar se qytetarët do t’i japin një përgjigje të qartë në zgjedhjet e 9 shkurtit. Bajrami përmendi edhe premtimet e pambajtura të qeverisë për ndërtimin e 160 çerdheve dhe përmirësimet në sektorin e arsimit.
“Populli do t’ua tregojë vendin jo veç për doracakët, por edhe për mashtrimet tjera,” tha Bajrami, duke apeluar për reflektim në prag të zgjedhjeve. /Kosovatimes/
