Rreth 31 punime, që të gjitha në drithëra, janë ekspozuar në Galerinë e Arteve në Gjakovë, në ekspozitën e dytë personale të skulptorit Alkent Pozhegu.
“Jam mundu ta shpalos një pjesë të historisë sime rreth artit të drithërave, rreth 31 punime , të gjitha janë në drithëra si dhe në skulpturë në formë të fluturës. Në realitet i kam përzgjedhë disa personazhe me famë botërore, aktorë të Holivudit, ka sportistë politikanë, atdhetarë dhe jam mundu ta shpalos në disa drejtime”, ka thënë Pozhegu.
Me këtë rast Alkenti thotë se i ka munguar shumë përkrahja në punën dhe krijimet e tij artistike.
“ Kur jemi te përkrahja me të vërtetë është një, lirisht mund ta them është një tmerr sepse gjatë tërë kohës jam vetë financues, kam përkrahje minimale ose hiq. Fatmirësisht në qytetin e Gjakovës e kuptojnë dhe e adhurojnë artin, jemi një grup shokësh, të gjithë kontribuojnë në mundësitë që kanë, dua ta falënderoj edhe komunën me ato mundësi që ka. Mirëpo unë do të vazhdoj të punojë dhe të mos ndalem sipas mundësive që kam, ka shtuar ai.
Mirëpo, zyrtarët e komunës thanë se Alkenti e meriton përkrahjen prandaj, siç u shpreh drejtoresha për kulturë në Gjakovë, Adea Roka, ky bashkëpunim nuk do të mungojë.
“Ku ka më bukur se sa në një ekspozitë të tillë. Unë i jam falënderuese Alkentit dhe i dëshiroj shumë suksese në punën e tij bashkëpunimi nuk do të mungojë, kurse edhe rekordet e tij nuk besoj që do të jenë këto të fundit. Me aq sa kam dëgjua unë për punët e tij në vazhdim nuk do të jenë të fundit”, ka thënë Roka.
Skulptori Alkent Pozhegu është fitues i tri çmimeve botërore Guinness me mozaikun e Dua Lipës, Rita Orës dhe presidentit amerikan, Donald Tramp.
