Angazhimi i pakursyeshëm në fushën e diplomacisë publike, por edhe të fushës së sigurisë dhe sundimit të ligjit, nëpërmes krijimit të raporteve miqësore me institucionet simotra të vendeve të zhvilluara evropiane, për Policinë e Kosovës, nga Ambasadori i Paqes Tahir Shabani, në prag të festave të fundvitit është kurorëzuar me një mirënjohje meritore me të cilën është dekoruar nga Sindikata e Policisë së Kosovës.
Ambasadori Shabani i cili gjendet këto ditë për vizitë në Kosovë, vizitë e cila korrespondon edhe me përgatitjen e ekipeve vëzhguese të zgjedhjeve parlamentare të 9 shkurtit 2025, është pritur në ambientet e zyrës së Sindikatës së Policisë së Kosovës, ku gjatë këtij takimi u diskutuan mundësi të shumta për krijimin e urave të bashkëpunimit, me qëllim që përmes Institutit për Bashkëpunim dhe Zhvillim (ICD), të cilin e drejton ambasador Shabani, të fuqizohet akoma më shumë bashkëpunimi në interes të paqes, sigurisë dhe sundimit të ligjit.
Ambasador Shabani ka njoftuar sindikalistët e Policisë së Kosovës edhe për përgatitjet e Institutit për bashkëpunim dhe Zhvillim lidhur me vëzhgimin e zgjedhjeve të shkurtit 2025. Gjithashtu, ata diskutuan mundësitë për promovimin e Sindikatës së Policisë së Kosovës në platformat ndërkombëtare dhe forcimin e lidhjeve me sindikatat në Francë dhe Zvicër.
Z. Shabani shprehu gatishmërinë e tij për të ndihmuar në krijimin e bashkëpunimeve të reja, duke theksuar rëndësinë e përkrahjes ndërkombëtare në zhvillimin e Policisë së Kosovës përmes trajnimeve të ndryshme që do të realizohen në të ardhmen për policinë dhe Sindikatën e PK-së.
Ky takim shënon një hap të rëndësishëm drejt një angazhimi më të gjerë dhe më të qëndrueshëm, për të avancuar dhe forcuar rolin e Sindikatës së Policisë së Kosovës në arenën ndërkombëtare.
Sindikatën e Policisë së Kosovës është e përkushtuar për zhvillimin e Policisë së Kosovës, mirëqenien dhe kushtet e punës për zyrtarët policorë. /Kosovatimes/
