Kandidati i LDK-së për kryeministër, Lumir Abdixhiku, ka prezantuar sot projektin për ndërtimin e një kompleksi të madh sportiv në Prishtinë, që përfshin Stadiumin Kombëtar, Pallatin e Ri të Sporteve, Pishinën Olimpike dhe Gaming Hall për sportet elektronike
Sipas tij, ky kompleks do të jetë më i madhi në rajon dhe do të përfshijë gjithashtu Fakultetin e Sporteve.
“Ky projekt është një investim i madh për të ardhmen e Kosovës. Kosova ka mundësitë financiare, ka nevojë për investime që krijojnë zhvillim dhe lënë shenjë në kohë. Kostoja e këtij projekti është rreth 60 milionë euro, një shumë që u shpërnda vetëm sot me një vendim të Qeverisë,” tha Abdixhiku.
Kreu i LDK-së theksoi rëndësinë e këtij kompleksi sportiv, i cili do të përfshijë Stadiumin Kombëtar me 25-30 mijë ulëse, Pallatin e Sporteve me 8 mijë ulëse, Pishinën Olimpike me 3 mijë ulëse dhe Gaming Hall me 2 mijë ulëse. Ai theksoi se ky investim do të sjellë kushte moderne për zhvillimin e sporteve dhe do të kontribuojë në zhvillimin e turizmit dhe ekonomisë së Kosovës.
“Kosova nuk mund të mbetet mbrapa në zhvillimin e infrastrukturës sportive. Ky kompleks modern do të ofrojë kushte të nivelit të lartë për sportistët dhe qytetarët tanë për dekada të tëra. Ky është një hap i rëndësishëm drejt avancimit të Kosovës në fushën e sporteve dhe zhvillimit të gjithanshëm,” shtoi Abdixhiku.
