Disa nga lagjet e qytetit të Prizrenit po përballen me reduktime të gjata të furnizimit me ujë të pijshëm. Në lagjen më të madhe të këtij qyteti, atë të “Bajram Currit” nuk ka ujë as në qendrën e Mjekësisë Familjare.
“Që kur ka filluar reduktimi në Prizren këtu nuk ka ujë, do të thotë pesë muaj i ka, na ditën se shohim hiq ujin, natën nuk e dimë. Higjienë s’ka, sa herë të kontrollosh pacientin duhet me i la duart a po?. Po i përdorim dezinfektuesit, por ????”, ka thënë mjeku në lagjen ” Bajram Curri”, Bektesh Kryeziu.
“Ka reduktime nga ora 9 deri në orën 6 në mëngjes, qytetarët janë të shqetësuar, nëse vazhdon kjo gjendje, mundet me ardhur deri te protesta”, ka thënë banori Dashmir Susuri.
“Katastrofë qe 6 muaj nuk kemi, në ora 8 ndalet edhe ajo që është ditën është katastrofë”, ka shtuar banori Nadir Kryeziu.
“Na kanë thënë hajt mos po bien shi e përmirësohet, hajt mos po bien borë edhe shi edhe bor ra po ne nuk kemi ujë rreth 10 orë”, ka thënë përfaqësuesi i Bashkësisë lokale, Pelivan Pulaj
Me reduktime të gjata me orar të papërshtatshëm po përballet edhe lagjja “Terzimahall”.
“Kur bahet ora katër uji ndalet e deri nesër në orën 10 nuk vjen, ditën vjen e çka po më duhet mu uji ditën”, ka shtuar Sadik Mangjuki – Banor i Prizrenit.
“Unë nga Austria kam ardhur, në 10 ndalet e tek deri nesërmen jemi pa ujë hiq”, ka thënë Seit Kastrati – Banor i Prizrenit.
Kryeshefi i “Hidroregjionit Jugor” Fadil Berisha, thotë se nga rënia drastike e nivelit të ujit, janë detyruar të aplikojnë këtë orar të reduktimeve.
“Me të gjitha kapacitetet tona jemi angazhua që ti aktivizojmë edhe puset alternative që i kemi pas, por momentalisht rezulton situata e tillë, kemi bë të pamundshëm dhe mundohemi me shërbimin teknik në baza ditore e vetmja mundësi e reduktimeve është ky orar që ne po aplikojmë”, ka thënë Berisha.
Zgjidhja e vetme e furnizimit të Prizrenit me ujë të pijshëm ngelet realizimi i projektit të Gurrës së Vërmicës dhe asaj të Poslishtit. Projekti ideor është gati dhe pritet të dorëzohet në fillim të viti 2025, ndërsa faza e parë do të kushtojë rreth 7 milionë euro.
