Qendra “Gjenocidi në Kosovë – Plagë e hapur” nëpërmjet një komunikate për media për mbylljen e fundvitit, ka shprehur mirënjohjen institucionale dhe qytetare për përkrahjen e nismës e miratimit të Rezolutës, që saktëson statusin e gjenocidit për luftën e fundit në Kosovë.
“Më 16 nëntor 2022, Qendra ‚Gjenocidi në Kosovë – Plagë e hapur‘ u është drejtuar institucioneve të Kosovës me një kërkesë që, lulëkuqja me katër petale, të bëhet simbol unik përkujtimor i gjenocidit në Kosovë. Kjo nismë hasi në përkrahje të jashtëzakonshme të intelektualëve të shquar të hapësirës mbarëkombëtare (personaliteteve të kulturës, artit, shkencës dhe sportit); të institucioneve shkencore; udhëheqës partish politike; deputetë të Kuvendit të Kosovës; shoqata anekënd globit tokësor etj. Në nivel të pushtetit lokal, asambletë e 23 komunave të Kosovës e miratuan pothuajse në mënyrë unanime që lulëkuqja me katër petale, të bëhet simbol unik përkujtimor i gjenocidit në Kosovë. Shpresojmë që gjatë vitit 2025, ky simbol të marrë formë zyrtare nga Kuvendi i Kosovës”, thuhet në komunikatë.
Qendra thekson se e sheh të domosdoshme koordinimin e veprimtarisë së saj me institucionet politike, shkencore dhe shoqatat, me qëllim që e vërteta për gjenocidin kundër shqiptarëve në Kosovë të pranohet botërisht.
“Vetëm duke u angazhuar për të ngadhënjyer drejtësia për të gjitha viktimat e gjenocidit, për ata mijëra fëmijë, gra, pleq, plaka dhe shqiptarë të të gjitha moshave që u vranë mizorisht nga forcat e armatosura të Serbisë, për ato dhjetëra mijëra femra shqiptare të përdhunuara seksualisht dhe për poshtërimet që u janë bërë rreth 1 milion shqiptarëve të dëbuar nga vatrat e tyre, ne mund t’i urojmë njëri-tjetrit një vit të ri të përpjekjes për të mbyllur plagën e gjenocidit që kullon gjak, dhembje dhe vuajtje të qindra mijëra familjeve shqiptare”, vazhdon komunikata. /Kosovatimes/
